चौगाव किल्ल्यावर तीन दिवसीय गडपूजन सोहळा उत्साहात संपन्न!

चोपडा प्रतिनिधी -

दरवर्षीप्रमाणे यंदाही धनत्रयोदशीपासून सलग तीन दिवस चौगाव किल्ल्यावर गडपूजन सोहळा मोठ्या उत्साहात पार पडला. या सोहळ्यात तालुक्यातील पाचशेहून अधिक दुर्गसेवकांनी सहभागी होत ऐतिहासिक वारशाप्रती श्रद्धा आणि गडसंवर्धनाची बांधिलकी व्यक्त केली.

सोहळ्याच्या पहिल्या दिवशी, ६ नोव्हेंबर रोजी श्री शिवप्रतिष्ठान हिंदुस्थान, चोपडा यांच्या वतीने गडपूजन करण्यात आले. सकाळी सात वाजता चोपडा येथील छत्रपती शिवाजी महाराज चौकात दुर्गसेवक एकत्र आले. महाराजांच्या प्रतिमेचे पूजन करून त्यांनी चौगाव किल्ल्याकडे प्रस्थान केले.

प्रारंभी तीर्थक्षेत्र त्रिवेणी महादेव मंदिरात पूजन करण्यात आले. त्यानंतर किल्ल्याच्या पूर्वाभिमुख प्रवेशद्वाराला तोरण बांधून परिसराची स्वच्छता करण्यात आली. रांगोळी काढून आई भवानी मंदिरात आरती करण्यात आली. पारंपरिक पद्धतीने गडपूजनाचा सोहळा पार पडला.

या कार्यक्रमाला ३०० हून अधिक दुर्गसेवकांची उपस्थिती होती. चोपडा शहर पोलीस स्टेशनचे पोलीस निरीक्षक पवन देसले, श्यामभाऊ परदेशी, अनिल वानखेडे, चौगावचे पोलीस पाटील गोरख हरचंद पाटील यांच्यासह विविध विभागांचे अधिकारी, पत्रकार व राजकीय क्षेत्रातील मान्यवर उपस्थित होते.

संयुक्त सर्वेक्षण रखडल्याने दुर्गसेवकांमध्ये नाराजी

चौगाव किल्ल्याला राज्य संरक्षित स्मारकाचा दर्जा मिळावा तसेच पर्यटनस्थळाचा 'ब' दर्जा प्राप्त व्हावा, यासाठी विविध दुर्गसंवर्धन संघटनांकडून सातत्याने पाठपुरावा सुरू आहे. मात्र, अद्याप किल्ल्याच्या संयुक्त सर्वेक्षणाची तारीख निश्चित झालेली नाही. त्यामुळे दुर्गसेवकांनी तीव्र नाराजी चे फटाके फोडले. शासन व संबंधित प्रशासनाने संयुक्त सर्वेक्षणाची तारीख तातडीने जाहीर करावी, अशी जोरदार मागणी या वेळी करण्यात आली आहे.