सावदे येथे ज्वारीच्या चाऱ्याला भीषण आग; हजारो पेंढ्या जळून खाक!

कजगाव प्रतिनिधी -

सावदे, ता. भडगाव : येथील शेतकरी विठ्ठल रामचंद्र परदेशी यांच्या शेतात साठवून ठेवलेल्या ज्वारीच्या चाऱ्याला अचानक भीषण आग लागल्याची घटना घडली. या आगीत सुमारे ४ हजार पेंढ्या आणि ५ एकर क्षेत्रातील जनावरांसाठी साठवलेला चारा जळून खाक झाला. तसेच चाऱ्याजवळ असलेले शेती अवजारे ठेवण्याचे शेडदेखील आगीच्या भक्ष्यस्थानी पडल्याने शेतकऱ्याचे मोठे आर्थिक नुकसान झाले आहे. आगीचे नेमके कारण अद्याप स्पष्ट झालेले नाही.

घटनेची माहिती मिळताच गावातील नागरिकांनी घटनास्थळी धाव घेत आग आटोक्यात आणण्याचा प्रयत्न केला. मात्र, आग भीषण असल्यामुळे नागरिकांना त्यावर नियंत्रण मिळवता आले नाही. या घटनेत सुदैवाने कोणतीही जीवितहानी झाली नाही; मात्र जनावरांसाठी मोठ्या मेहनतीने साठवून ठेवलेला चारा जळून गेल्याने शेतकऱ्यापुढे जनावरांच्या चाऱ्याचा गंभीर प्रश्न निर्माण झाला आहे.

महसूल अधिकाऱ्यांकडून पाहणी

घटनेची माहिती मिळाल्यानंतर महसूल अधिकारी गौरव पगारे यांनी घटनास्थळी भेट देऊन नुकसानीची पाहणी केली. तसेच शिवसेना विभागप्रमुख धनंजय भाऊ देसले यांनीही घटनास्थळी भेट देत परिस्थितीची माहिती घेतली.

सध्या दुष्काळसदृश परिस्थितीमुळे जनावरांसाठी चारा उपलब्ध करणे शेतकऱ्यांसाठी आव्हानात्मक ठरत आहे. अशा परिस्थितीत साठवून ठेवलेला चारा आगीत जळून गेल्याने परदेशी यांचे मोठे नुकसान झाले आहे. त्यामुळे प्रशासनाने या घटनेची गांभीर्याने दखल घेऊन नुकसानीचे पंचनामे करावेत आणि नुकसानग्रस्त शेतकऱ्याला तातडीने आर्थिक मदत द्यावी, अशी मागणी नागरिकांकडून होत आहे.

आगीचे नेमके कारण काय, याबाबत अद्याप स्पष्टता नसून, या घटनेमुळे परिसरातील शेतकऱ्यांमध्ये चिंता व्यक्त केली जात आहे.